生成式 AI 嘅浪潮一浪接一浪，唔再係科技人嘅專利，而係任何專業人士都要面對嘅現實。
「你同 AI 嘅距離，係一杯咖啡嘅距離。」
2025 年 6 月 7 日，無線科技商會會長 Keith Li 現身 PolyU SPEED AI 驅動數碼與社交媒體市場營銷專業證書課程，為一班主修 AI 數碼營銷嘅學生帶嚟一場啟發性十足嘅講座。開場呢句說話，一針見血，為成場拉開序幕。
 |
| 你同 AI 嘅距離，真係只係一杯咖啡咁近？Keith Li 喺 PolyU SPEED 分享用得其法，AI 才能成為你職場強化器。 |
免費 AI？係得，但係得咁多
市面上有好多免費 AI 平台，但 Keith 一針見血咁講：「唔俾錢嗰啲就玩具；俾錢嗰啲就叫武器。你唔會攞把玩具帶上去戰場打仗。」全場學生聽完笑晒，但句句都中 point。
佢當場問學生：「有冇人課金用 Poe 或 ChatGPT？」結果全班只有 3 個學生舉手。Keith 回應：「其實係兩個世界嚟㗎。」
佢再補充：「九成人覺得 AI 冇咁好用，唔係因為技術唔夠，而係根本未用過真正嘅工具。」
連杯咖啡嘅錢都唔願畀，又點 expect 得到 AI 發揮真正威力？
以 Poe 為例，最低月費方案只要 $39 港幣，就可以用到 GPT-4.1、Claude 4、Gemini 2.5 等頂級模型。呢啲付費平台，無論反應速度、準確率、可用功能，都遠遠超過免費版本。如果你只停留喺免費層面，就好似打機淨係用練功，永遠唔會知咩叫神器。
AI 唔係聰明，但你可以因佢變得更聰明
Keith 喺講座入面反覆強調一點：AI 唔係聰明，而係實用。
佢話得白：「AI 就係作文機、圖像機、資訊機——唔會推理、唔識記住你講過乜、仲成日扮叻。」但正正因為佢唔聰明，先唔會取代你——會取代你嘅，係識用佢嘅人。
學得多，不如學得深
市面 AI 工具多到眼花撩亂，但 Keith 教落最重要一樣：
少工具，深掌握。
好多同學以為越多工具越叻，實情係樣樣試過但樣樣唔熟。佢話與其學十個，倒不如用熟 ChatGPT、Poe、Perplexity 或 Copilot 嘅其中一個，日日練習，建立 prompt 思維。AI 用得熟，先至可以幫你自動寫稿、整理報告、做設計、回覆客戶、分析數據。
實戰應用，學生可以點用？
講完理論，Keith 亦用一連串例子講解點樣真係幫到手。喺講座現場，佢示範咗多個實戰例子，令學生即場感受到生成式 AI 嘅真正威力。他用 ChatGPT 幫公司改寫招標文件內容，甚至用嚟起草實習生嘅推薦信、處理 HR 嘅電郵對答，展現咗 AI 點樣應用喺職場日常事務之中。佢亦現場示範點樣用 AI 自動生成社交平台貼文，包括文字同圖片——只要輸入 prompt，唔使識設計、唔使排版，一樣做到專業水準。
此外，佢展示咗點樣用 AI 分析金融市場資訊、做資料統整、寫報告，甚至處理多語言內容翻譯。學生聽完之後都覺得震撼，因為原來日常好多 tedious 嘅工作，其實早就可以交畀 AI 幫你搞掂，幫你節省時間同提升準確度。
Keith 講得最震撼嘅一句話係：「你 online 見到嘅 9 成內容，都唔係人寫。」唔論 LinkedIn 文章、IG 貼文，甚至品牌客戶服務回覆，AI 已經悄悄變成幕後主力，真正落地應用緊。
應對轉型，要靠主動出擊
事實上，AI 嘅門檻唔係技術，而係習慣。Keith 提醒大家，生成式 AI 唔係學幾個工具咁簡單，而係要變成你每日解難、處事、甚至懶惰時的「反射動作」。喺職場上，識用 AI 嘅人唔止係高效，更開始重塑自己嘅工作角色，逐步升級成策略思維主導者。
對已經身處職場嘅人嚟講，轉型唔係選擇，而係生存。你可以等公司叫你學，但更好嘅選擇係主動出擊，用 AI 提升自己價值。真正被時代淘汰嘅，從來唔係資歷淺，而係拒絕進化。
結語：未用 AI，你已經落後
Keith 最後提醒大家：AI 唔係替你做嘢，而係幫你做快十倍。
佢用一句講晒精髓：「普通人配 AI，可以變高手；高手配 AI，可以變傳奇。但普通人又唔識用 AI，就真係瀨嘢。」
咁你呢？連杯咖啡都唔願畀，AI 點幫到你？不如就由今日試一次？
附錄：香港主流咖啡店 $35-$45 咖啡價錢整合表
作為一個咖啡愛好者，當然要考證一下現在香港一杯咖啡的價錢。
| 咖啡店名稱 | 咖啡種類 | 價錢 (港元) | 備註 |
|---|---|---|---|
| NOC Roastery | 拿鐵、美式、卡布奇諾 | $38-$42 | 精品咖啡店 |
| 18 Grams | 拿鐵、美式、Flat White | $38-$45 | 精品咖啡店 |
| Knockbox Coffee | 手沖咖啡、意式咖啡 | $40-$45 | 精品咖啡店 |
| Winstons Coffee | Flat White、Cappuccino | $40-$45 | 精品咖啡店 |
| Accro Coffee | 虹吸咖啡、意式滴濾 | $40-$45 | 精品咖啡店 |
| Starbucks | 美式咖啡（大杯） | $35-$39 | 連鎖咖啡店 |
| Starbucks | 拿鐵（大杯） | $39-$45 | 連鎖咖啡店 |
| Starbucks | 卡布奇諾（大杯） | $39-$45 | 連鎖咖啡店 |
| Starbucks | 鮮奶咖啡 | $40.5-$45 | 連鎖咖啡店 |
| 瑞幸咖啡 Luckin | 美式、拿鐵 | $39 | 連鎖咖啡店 |
| 瑞幸咖啡 Luckin | 生椰拿鐵 | $42 | 連鎖咖啡店 |
| 麥當勞 McCafé | 拿鐵（大杯） | $26.5 | 連鎖咖啡店，低於\$35 |
*此表格用Felo Search 搜尋及製作
— Dr. Ken FONG
👉 閱讀英文版文章
Posts
0 Comments